歐洲國家盃外圍賽C組榜首雙雄分途出師，暫列次名嘅德國作客對榜尾愛沙尼亞，基於呢組3強荷蘭、德國同北愛爾蘭同積12分，德國喺對賽成績輸咗畀荷蘭，為確保前兩名出線資格，今場冇失分空間，好在佢哋今年一周雙賽表現例牌第2場好過第1場，黑柴上周三晚捧完德國對家，今晚德國強陣遇弱就要撐番佢，「讓球主客和」德國讓到3球，都照捧讓球客勝。

德軍啱啱喺主場兩球領先下畀阿根廷逼和，但該役領隊勒夫志在試陣，中堅羅賓高治、前鋒禾特舒密特、中場拿迪安阿美利同蘇奧沙達都如願首次為國家隊上陣，24歲嘅拜仁中場甘美治亦為首度擔任國家隊隊長而高興。不過今晚踢正式賽事，主將紐亞、馬高列奧斯、迪姆華拿同根度簡都會復出，而且佢哋今年每遇一周雙賽，第2場成績總好過第1場，睇番對手愛沙尼亞今屆歐國外主場3戰皆北共失8球，德軍6月主場曾經大炒過佢哋8蛋，今場作客就算打個5折，都足以開出讓球客勝，更何況畀勒夫改造成正中鋒嘅基拿比近期仲着晒火添！
 

至於榜首荷蘭喺稍早時間作客白俄羅斯，荷蘭歐國外3連勝共轟11球，包括擊敗德國同北愛兩支爭出線勁敵，前線迪比同賴恩巴布都弗爆，不過要留意佢哋慣性慢熱，呢11個入球得1個係上半場取得，當中7球更喺完場前15分鐘至入，對德國同北愛都係落後下反勝。今晚面對近5仗主場只失3球，僅負0比2同0比1畀德國及北愛嘅白俄羅斯，早段戰情隨時膠着。基於白俄入球能力低，半場細賠率又冇肉食，黑柴建議先小敲2.85倍荷蘭贏1比0嘅半場波膽，到下半場等白俄戰將開始攰，睇啱形勢再走地捧大盤。

周一凌晨歐國外E組大戰，威爾斯主場挑戰「1哥」克羅地亞。威爾斯出線形勢嚴峻，為搶分不惜大舉進攻，然而「格子軍團」貴為世盃亞軍實力超班，絕對有能力乘虛而入，開局反客為主都唔出奇，半場客勝好路。

排名E組第4嘅威爾斯，上仗靠前鋒基化摩亞嘅頭槌入波，以1比1打和斯洛伐克搶得1分，為晉級決賽周留下一線生機。取得個人首個國家隊入波嘅基化摩亞當然值得開心，不過呢位效力英冠韋根嘅高中鋒，職業生涯多數時間都喺英格蘭低組別聯賽揾食，實力認真有限，相反效力意甲豪門祖雲達斯嘅艾朗藍斯雖然已經傷愈復出，不過就冇被徵召，多少令人懷疑領隊傑斯嘅選人策略。而且威爾斯防線欠穩問題嚴重，近4仗歐國外都未能保持清白身，對住實力超班嘅克羅地亞，後防隨時再有甩漏。

克羅地亞去年歷史性打入世盃決賽之後，曾經有段時間陷入低潮，可幸陣中多位球員包括莫迪歷同拿傑迪錫等，都喺歐洲頂級球會擔任主力，整體實力衰極都有譜。況且「格子軍團」近期歐國外已經重回正軌，上仗以3比0擊敗匈牙利後，暫時高踞E組榜首，為鞏固1哥地位爭取決賽周入場券，肯定繼續積極搶分，克羅地亞近4仗歐國外全部半場就取得領先優勢，呢場對住威爾斯隨時先下手為强，半場客勝值博。